ITALI– Blogerja dhe sipërmarrësja e njohur e modës, Chiara Ferragni, po përballet me pasojat e një skandali bamirësie që ka goditur karrierën dhe perandorinë e saj financiare. Me një vlerë të deklaruar prej 82 milionë dollarësh, Ferragni ishte pjesë e një fushate për të promovuar tortën Pandoro të gjigantit Balocco në fund të vitit 2022, ku pretendohej se një pjesë e të ardhurave do të shkonte për spitalin e fëmijëve “Regina Margherita” në Torino.
Gazetarja italiane Selvaggia Lucarelli zbuloi se spitali nuk mori asnjë përqindje të shitjeve, por vetëm një donacion të vetëm prej 54,000 dollarësh nga Balocco, ndërsa Ferragni nuk dhuroi asgjë.
Pas reagimeve të forta, ajo kërkoi falje dhe njoftoi një donacion personal prej 1.1 milion dollarësh.
Megjithatë, pasojat ishin të rënda: marrëveshjet e saj të sponsorizimit u ndërprenë, Coca-Cola dhe Tod’s u larguan nga partneritetet, dyqani kryesor në Milano u mbyll dhe kompanitë e saj, Fenice dhe TBS Creë, panë rënie të ardhurash me 94-95%, duke shkaktuar humbje miliona dollarëshe dhe pushime masive punonjësish.
Ferragni është kthyer në qendër të vëmendjes pasi u paraqit në Pallatin e Drejtësisë në Milano në nëntor për fillimin e gjyqit për mashtrim, duke u dukur me një kostum konservator.
Chiara do të rikthehet në gjykatë në janar 2026 për të dëgjuar dënimin, me prokurorët që kërkojnë 20 muaj burgim. Rasti i blogeres dhe biznesmenes të famshme italiane është kthyer në një nga skandalet më të diskutueshme të industrisë së modës italiane, duke dëmtuar imazhin dhe bizneset e influencueses./Radar.al