Administrata Trump ka urdhëruar zyrtarët konsullorë amerikanë të aplikojnë një regjim shumë më të rreptë kontrolli për aplikantët e vizave, veçanërisht për kategorinë H-1B, duke refuzuar hyrjen në SHBA të çdo personi që ka qenë i përfshirë në “censurë ose tentativë censurimi” të shprehjes së mbrojtur ligjërisht në Shtetet e Bashkuara, raporton Reuters duke cituar një komunikim të brendshëm të Departamentit të Shtetit.
Sipas direktivës së dërguar më 2 dhjetor në të gjitha misionet diplomatike amerikane, zyrtarët udhëzohen të verifikojnë CV-të, profilet në LinkedIn dhe çdo informacion tjetër publik për të përcaktuar nëse një aplikant – ose anëtar familjeje që udhëton me të – ka punuar më parë në fusha të tilla si:
moderimi i përmbajtjes,
verifikimi i fakteve,
menaxhimi i dezinformimit/keqinformimit,
përputhshmëria (compliance),
ose siguria online.
Nëse konstatohet se individi ka marrë pjesë në censurimin e fjalës së mbrojtur në SHBA, ai konsiderohet automatikisht i papranueshëm për vizë. Dokumenti e zgjeron politikën edhe në kategori të tjera vizash, por kërkon kontroll më të detajuar për H-1B, pasi këta aplikantë punojnë shpesh në kompani teknologjike dhe platforma sociale që merren me moderim përmbajtjeje.
Sipas burimeve të Reuters, udhëzimi i kërkon zyrtarëve konsullorë që të “eksplorojnë me imtësi historinë e punësimit” të çdo aplikanti për të zbuluar rol të mundshëm në aktivitete ndaj fjalës së lirë. Direktiva zbatohet si për aplikimet e reja, ashtu edhe për rishikimet.
Një zyrtar i lartë i Departamentit të Shtetit, duke komentuar për Fox News, theksoi se administrata synon të mbrojë amerikanët nga “të huaj që vijnë të censurojnë fjalën e tyre”:
“Ne nuk duam që individë të tillë të punojnë në SHBA si censorë që u mbyllin gojën amerikanëve. Edhe vetë Presidenti ka qenë viktimë e këtij abuzimi nga kompanitë e mediave sociale.”
Kjo lëvizje vjen në një moment kur administrata amerikane ka rritur kritikat ndaj politikave të BE-së mbi moderimin e përmbajtjes online. Më 4 dhjetor, zëvendëspresidenti JD Vance reagoi ndaj raportimeve për një gjobë të mundshme ndaj platformës X, duke deklaruar se BE “duhet të mbështesë fjalën e lirë, jo të ndëshkojë kompanitë amerikane”.
Ky qëndrim u përforcua edhe nga nëndrejtoresha e Departamentit të Shtetit, Sarah Rogers, e cila publikoi një video ku listoi raste në Evropë dhe Britani për të cilat njerëz janë hetuar ose ndëshkuar për komente online, përfshirë një rast në Gjermani ku një grua mori një dënim më të ashpër “se një përdhunues i dënuar”.
Në maj, senatori Marco Rubio paralajmëroi mundësinë e ndalimeve të vizave për individët ose zyrtarët e huaj të përfshirë në censurimin e fjalës së amerikanëve, veçanërisht në rrjetet sociale.
Politika e re konsullore plotëson masat e mëparshme të administratës:
verifikime të thelluara të rrjeteve sociale për vizat studentore,
tarifa të reja për vizat H-1B,
dhe rishikimin e kritereve të emigracionit.
Kontrolli i shtuar ndaj roleve të lidhura me moderimin e përmbajtjes dhe verifikimin e fakteve shihet si hapi më i fundit i administratës për ta përafruar politikën e vizave me angazhimin e saj ndaj mbrojtjes së fjalës së lirë në SHBA.