Polonia ka miratuar përfundimisht ndalimin e prodhimit të veshjeve prej gëzofi, duke mbyllur një nga sektorët më të mëdhenj të këtij lloji në Evropë. Sipas të përditshmes italiane Wired, Presidenti Karol Nawrocki firmosi të martën ligjin që ndalon fermat e gëzofit, duke e bërë vendin anëtarin e 18-të të BE-së që mbyll këtë industri, e cila çdo vit sillte vdekjen e rreth tre milionë vizonëve, dhelprave, qenve, rakunëve dhe çinçilave.
Ky vendim godet drejtpërdrejt një sektor ku Polonia ishte prodhuesja kryesore në Europë dhe e dyta në botë pas Kinës. Aktualisht në vend operonin 281 ferma, përfshirë 169 për vizonë, 37 për dhelpra, 11 për qen e rakunë dhe 64 për çinçila.
Ligji u miratua pas dakordësisë ndërpartiake në Sejm dhe Senat gjatë muajit të kaluar, ndërsa kundërshtimi i vetëm erdhi nga partia e ekstremit të djathtë “Konfederacja”, sipas Notes from Poland.
Sipas projektligjit, hapja e fermave të reja ndalohet menjëherë, ndërsa objektet ekzistuese duhet të mbyllen përfundimisht deri më 31 dhjetor 2033. Parashikohet edhe një skemë kompensimi për mbylljet e hershme: fermat që ndërpresin aktivitetin para 1 janarit 2027 do të përfitojnë deri në 25% të të ardhurave mesatare të viteve 2020–2024.
Industria e gëzofit në Poloni kishte qenë në rënie prej kohësh. Sipas Business of Fashion, eksportet e gëzofit të vizonit kanë rënë nga 402 milionë euro në vitin 2015 në vetëm 71 milionë euro në 2024. Po ashtu, numri i fermave ka rënë nga 810 në vitin 2015 në 281 aktualisht.
Sondazhet tregojnë një mbështetje të gjerë publike për këtë vendim: 66% e polakëve e mbështesin ndalimin e sektorit të gëzofit.