Një sulm i armatosur ka tronditur sot shkollën konviktore për vajza në shtetin Kebbi të Nigerisë, ku persona të armatosur vranë zëvendësdrejtorin dhe rrëmbyen 25 nxënëse. Ngjarja ndodhi rreth orës 04:00 të mëngjesit, në “Shkollën e Mesme Qeveritare Gjithëpërfshirëse për Vajza” në qytetin Maga, raportoi policia për CNN.
Sipas zëdhënësit të policisë, Nafiu Abubakar Kotarkoshi, sulmuesit përdorën “taktika të koordinuara”, duke hapur zjarr ndaj forcave të sigurisë përpara se të kapërcenin gardhin perimetral dhe të rrëmbenin vajzat. Zëvendësdrejtori i shkollës, Hassan Yakubu Makuku, u vra teksa po përpiqej t’u rezistonte sulmuesve, ndërsa një anëtar tjetër i stafit mbeti i plagosur.
Forcat policore dhe ushtarake janë vendosur në zonë për të ndjekur gjurmët e sulmuesve, duke kontrolluar rrugët e mundshme të arratisjes dhe zonat pyjore përreth. Operacioni i kërkim-shpëtimit po vijon.
Rajoni veriperëndimor i Nigerisë ka qenë prej kohësh i prekur nga valë rrëmbimesh të ngjashme nga bandat e armatosura që synojnë marrëdhënie shpërblimi. Ngjarja rikthen kujtimet e rrëmbimit famëkeq të vitit 2014 në Chibok, kur Boko Haram rrëmbeu 270 nxënëse, një pjesë e të cilave nuk u gjetën kurrë.