Ministria e Mbrojtjes ka lëshuar një njoftim urgjent për përkeqësim të motit nga dita e hënë, 17 nëntor, deri më 20 nëntor, duke paralajmëruar reshje të dendura shiu, stuhi, dëborë në zonat e larta dhe rrezik ngricash.
Sipas IGJEO dhe Shërbimit Meteorologjik Ushtarak, më të prekurat do të jenë qarqet Shkodër, Kukës, Vlorë dhe Gjirokastër, të cilat përgjatë tre ditëve të para të javës pritet të përballen me reshje intensive deri lokalisht shumë intensive.
Parashikimi ditor
E Hënë, 17 Nëntor
• Reshje mesatare deri intensive në: Shkodër, Lezhë, Vlorë
• Reshje të dobëta–mesatare me shtrëngata në: Kukës, Dibër, Durrës, Tiranë, Gjirokastër
• Intensifikim i reshjeve në pasdite.
E Martë, 18 Nëntor
• Reshje shumë intensive në: Shkodër, Kukës, Vlorë, Gjirokastër
• Reshje intensive në: Lezhë
• Reshje mesatare deri intensive në: Dibër, Durrës, Tiranë
• Shtrëngata në të gjithë territorin.
E Mërkurë, 19 Nëntor
• Reshje me intensitet të lartë në gjithë vendin.
• Qarqet veriore dhe jugore me reshje shumë intensive.
E Enjte, 20 Nëntor
• Ulje e intensitetit.
• Reshje të dobëta–mesatare në: Shkodër, Vlorë, Gjirokastër, të dobëta në qarqet e tjera.
Dëborë, ngrica dhe rrezik përmbytjesh
Në zonat mbi 400 m lartësi në Veri, Lindje dhe Juglindje reshjet do të kthehen në dëborë, duke krijuar rrezik ngricash dhe vështirësi në qarkullim.
Në basenin e Drinit parashikohen sasi të larta reshjesh:
• Fierza: 150–200 mm
• Koman–Vau i Dejës: deri në 300 mm
Apeli i Ministrisë së Mbrojtjes
Ministria, përmes Agjencisë Kombëtare të Mbrojtjes Civile, kërkon:
✔ Marrje masash parandaluese për shmangien e përmbytjeve
✔ Gatishmëri të plotë të strukturave vendore
✔ Koordinim të shtuar ndërinstitucional për menaxhimin e emergjencave
Emergjencat Civile do të publikojnë përditësime të vazhdueshme, ndërsa qytetarët e zonave të prekura u kërkohet kujdes i shtuar gjatë kësaj periudhe me reshje intensive.