Pas një shqetësimi të ngritur nga një qytetar për njohjen e viteve të punës në Greqi, kryeministri Edi Rama njoftoi se qeveria shqiptare ka ngritur tashmë grupet negociatore dhe ka nisur bisedimet zyrtare me Athinën për njohjen e pensioneve – një marrëveshje e ngjashme me atë që Shqipëria ka arritur me Italinë.
Rama tha se ky është një nga problemet më të mëdha që hasin qytetarët që kanë punuar për vite me radhë jashtë, kryesisht në Greqi, pasi kur rikthehen në Shqipëri dhe shohin pensionin, shpesh përballen me shuma shumë të ulëta. Ai sqaroi se kjo vjen edhe si pasojë e boshllëqeve të krijuara në fondin e pensioneve gjatë viteve ’90, kur shumë shqiptarë emigruan dhe kontribuan jashtë vendit.
“Gjeneratat që punojnë sot paguajnë pensionet e atyre që janë në pension, kështu krijohet një hendek i madh,” – tha Rama. Sipas tij, njohja e pensioneve me Greqinë do të plotësojë një pjesë të rëndësishme të mozaikut të zgjidhjeve afatgjata, ashtu siç u realizua me Italinë.
Kryeministri u shpreh optimist për përfundimin me sukses të negociatave, edhe pse pranoi se procesi është më i ndërlikuar për shkak të numrit shumë të madh të emigrantëve shqiptarë që kanë punuar në Greqi dhe kapaciteteve më të kufizuara të shtetit fqinj për të përballuar një marrëveshje të tillë.