Një skandal i gjerë korrupsioni ka tronditur qeverinë ukrainase, duke çuar në dorëheqjen e ministres së Energjisë, Svitlana Grynchuk, dhe ministrit të Drejtësisë, Herman Halushchenko.
Të dy dhanë dorëheqjen pas një hetimi të thellë për abuzime në sektorin energjetik, që përfshinte edhe operatorin shtetëror bërthamor Enerhoatom. Presidenti Volodymyr Zelensky kërkoi shkarkimin e tyre të mërkurën, vetëm dy ditë pas publikimit të akuzave kundër disa bashkëpunëtorëve të tij për skemë masive përvetësimi fondesh në energji.
Hetimi 15-mujor, i zhvilluar nga Byroja Kombëtare Kundër Korrupsionit dhe Prokuroria e Specializuar, përfshiu rreth 1,000 orë përgjime dhe zbuluar përfshirjen e katër anëtarëve të qeverisë. Sipas prokurorëve, rreth 100 milionë dollarë janë pastruar përmes skemës, duke përfshirë edhe transferime jashtë Ukrainës, përfshirë Rusinë. Fotot e çantave me para të gatshme janë publikuar si prova.
Ministri Halushchenko ka deklaruar se do t’i kundërshtojë akuzat, ndërsa Grynchuk u shpreh në rrjetet sociale se “në veprimtarinë time profesionale nuk ka pasur shkelje të ligjit”.
Skandali ndodh në një kohë kur Rusia ka intensifikuar sulmet ndaj infrastrukturës energjetike të Ukrainës, duke përfshirë nënstacionet që furnizojnë me energji centralet bërthamore.