Një incident i pazakontë ka ndodhur të hënën në ambientet e Bashkisë së Pogradecit, gjatë një mbledhjeje të Këshillit Bashkiak me prezencë të qytetarëve. Gjatë diskutimeve, situata degjeneroi në një konflikt fizik, ku një 27-vjeçar u përplas me një prej anëtarëve të këshillit.
Policia arrestoi në flagrancë Kevi Muçllarin, 27 vjeç, banues në Pogradec, i dyshuar për veprën penale “Goditje për shkak të detyrës” ndaj anëtarit të Këshillit Bashkiak, Engjëll Shyti.
Pas arrestimit, dhjetëra banorë u mblodhën para Komisariatit të Pogradecit, duke kërkuar lirimin e Muçllarit. Ata pretendojnë se 27-vjeçari reagoi ndaj një provokimi nga këshilltari Shyti dhe se ai nuk duhet të ndëshkohet për një situatë që, sipas tyre, lindi nga sjellja e përfaqësuesve vendorë.
Avokati: Nuk ka goditje për shkak të detyrës, ishte shtyrje e përbashkët
Avokati i Muçllarit, Endri Çela, kundërshtoi ligjshmërinë e arrestimit, duke deklaruar se përplasja nuk përbën elementët e veprës penale të pretenduar.
“S’kemi të bëjmë me goditje klasike për shkak të detyrës. Ka qenë një shtyrje e përbashkët dhe mosmarrëveshja nuk u provokua nga Kevi,” tha Çela. Ai shtoi se konflikti nuk lidhet me procesin e votimit, por me tensione që shpërthyen pasi mbledhja kishte përfunduar.
Çela konfirmoi se do t’i kërkojë Prokurorisë të shpallë arrestimin si të paligjshëm, ndërsa, në rast refuzimi, çështja do t’i dërgohet gjykatës për vlerësim dhe për të shmangur çdo masë sigurimi ndaj 27-vjeçarit.
Hetimet vijojnë për sqarimin e plotë të rrethanave të incidentit.