Policia e Tiranës ka finalizuar operacionin “Kufizimi”, pas zbardhjes së një rasti rrëmbimi dhe dhune ndaj një 27-vjeçari, i cili u mbajt për disa orë i izoluar në një apartament, për t’i marrë me forcë 5,000 euro.
Hetimet identifikuan pesë autorë të dyshuar. Në pranga ranë L. K., 24 vjeç dhe A. N., 24 vjeç, ndërsa tre të tjerë – K. N., 23 vjeç, M. M., 21 vjeçe dhe S. C., 25 vjeçe – janë shpallur në kërkim.
Gjatë operacionit, policia arrestoi edhe A. K., 60 vjeç, babai i njërit prej të ndaluarve, pasi në banesën e tij u gjet një pistoletë me municion luftarak. U sekuestruan gjithashtu 5,000 euro, 6 telefona dhe një automjet.
Sipas policisë, grupi kishte bashkëpunuar për t’i marrë paratë viktimës përmes kanosjes dhe dhunës fizike. Materialet i janë referuar Prokurorisë për veprime të mëtejshme.