Autoritetet austriake kanë sekuestruar një depo armësh në Vjenë, që dyshohet se lidhet me Hamasin dhe ishte planifikuar të përdorej për sulme të mundshme terroriste në Evropë. Lajmi u konfirmua nga qeveria austriake të enjten.
Sipas të dhënave paraprake të hetimit, objektivat e mundshme të këtyre sulmeve ishin institucione izraelite ose hebraike në disa vende evropiane.
Hetimi është pjesë e një operacioni të gjerë ndërkombëtar të drejtuar nga Drejtoria e Sigurisë së Brendshme dhe Inteligjencës së Austrisë (DSN), e cila po ndjek gjurmët e një organizate globale të lidhur me Hamasin.
Në kuadër të këtij operacioni, një 39-vjeçar britanik, i dyshuar se kishte lidhje me arsenalin, u arrestua në Londër të hënën, raportoi The Independent.
Armët u zbuluan të fshehura në një valixhe brenda një depoje me qira në Vjenë. Të sekuestruara u gjetën pesë pistoleta dhe 10 karikatorë, të cilat dyshohet se ishin siguruar nga kompani të huaja të lidhura me Hamasin.
Hetimet po vazhdojnë në bashkëpunim me autoritetet britanike dhe partnerë të tjerë evropianë.