Këngëtarja Elsa Lila ka hedhur akuza të forta për mënyrën si u zhvillua Festivali i Këngës në RTSH, duke ngritur dyshime për blerje votash dhe manipulim të rezultatit që dërgoi Albinën dhe familjen Kelmendi në Eurovision.
E ftuar në emisionin “Mirëmbrëma Yje”, artistja u shpreh se pavarësisht se juria e vlerësoi me çmimin e parë, vendimi i publikut për ta dërguar Albinën në Eurovision “nuk përfaqësonte realitetin”.
“Ju mendoni që m’u dha haku që meritoja? Mendoj që jo, ç’publik?”, tha Elsa me tone të forta, duke shtuar se “provat janë të shumta” dhe se “votat janë blerë nga publiku, pafund”.
Ajo pranoi se kishte mundësi ta çonte çështjen në gjykatë, por vendosi të mos e bënte:
“Atë çështje do e kisha çuar shumë larg, por nuk e bëra. Nuk desha t’i jepja më shumë famë skandalit.”
Elsa kujtoi edhe raportin e saj të hershëm me Albinën në The Voice of Albania 2014, duke e përmendur pa e përmendur me emër:
“Nuk e bëra skandalin për të mos e bërë për herë të dytë akoma më të famshëm atë njeri që e bëra në 2014 me duart e mia, me diturinë time dhe me artin tim.”
Në fund, këngëtarja lëshoi një paralajmërim të fortë:
“Të kenë kujdes nga gjykatat, sepse funksionojnë kur duan. Hakmarrja është një pjatë që shërbehet e ftohtë.”