Një rast i paprecedentë ka tronditur sportin shqiptar. Volejbollistja braziliane e Dinamos, Nayara Ferreira, është pezulluar përkohësisht pas dyshimeve mbi gjininë e saj, duke u detyruar të kryejë test gjaku për ta vërtetuar.
Dyshimet, sipas burimeve, kanë lindur vetëm nga “biseda korridoresh”, pa asnjë bazë ligjore apo mjekësore. Kjo situatë e ka prekur rëndë sportisten, e cila në një intervistë për Top Channel rrëfeu se po kalon ditët më të vështira të karrierës së saj.
“Është hera e parë që përjetoj diçka të tillë. Luaj volejboll që në moshën 12-vjeçare dhe asnjëherë nuk jam trajtuar në këtë mënyrë. Kjo është shumë e dhimbshme për mua”, tha Ferreira me lot në sy.
Nayara ka një karrierë 15-vjeçare në Europë dhe Lindjen e Mesme, me përvoja në Finlandë, Spanjë, Portugali, Republikën Çeke dhe Arabinë Saudite. Në Shqipëri, ajo është përballur me atë që e quan “diskriminim të pastër”.
“Nuk më kanë dhënë asnjë arsye ligjore. Pyeta pse e bënë dhe më thanë se dokumenti është privat. Po si mund të jetë private diçka që lidhet me jetën time?”, u shpreh ajo e tronditur.
Prej më shumë se një jave, Ferreira është izoluar në shtëpi dhe po përballet me presion të madh psikologjik. “Stresi dhe padrejtësia që po kaloj do t’u kthehen atyre që po ma bëjnë këtë,” shtoi ajo.