Pas pezullimit të volejbollistes braziliane të Dinamos, Nayara Ferreira, lidhur me kërkesën për një test gjinie, klubi ka reaguar publikisht përmes një komunikate për shtyp.
Sipas Dinamos, informacionet e publikuara në media janë të vërteta, por vendimi i Federatës Shqiptare të Volejbollit erdhi befas për klubin dhe nuk shoqërohej me sqarime konkrete ose prova që të justifikonin kërkesën për një test të tillë.
Klubi nënvizon se është i përkushtuar ndaj rregullave dhe standardeve të sportit, respektit ndaj fair play dhe dinjitetit njerëzor. Nayara Ferreira ka një karrierë 15-vjeçare ndërkombëtare, duke përfshirë edhe vendet e Bashkimit Evropian, dhe është sportiste me licencë zyrtare FIVB.
Dinamo shpreh gatishmërinë për të bashkëpunuar me FSHV-në dhe për të trajtuar rastin në mënyrë korrekte dhe të matur, duke mbrojtur vlerat e sportit, drejtësinë dhe dinjitetin e sportistëve. Klubi thekson se sporti duhet të bashkojë dhe jo të poshtërojë, duke mbajtur fokusin te transparenca dhe respekti ndaj individit.