Volejbolli shqiptar është përballur me një ngjarje të paprecedentë. Nayara Ferreira, volejbollistja 32-vjeçare e Dinamos, është pezulluar përkohësisht nga Federata Shqiptare e Volejbollit (FSHV) pas disa ankesa të ngritura në lidhje me gjininë e saj.
Sipas burimeve të Panorama Sport, rivalët e Dinamos kanë sinjalizuar federatën, duke bërë që klubi të përballet me kërkesën për kryerjen e një ‘testi të gjinisë’ për brazilianen.
Situata ka shkaktuar tronditje dhe pakënaqësi te volejbollistja, e cila nuk e ka pritur mirë pezullimin dhe e ka konsideruar këtë diskriminuese. Megjithatë, Nayara dhe klubi janë të gatshëm të bashkëpunojnë me autoritetet dhe të ndjekin hapat mjekësorë të nevojshëm për verifikimin e gjinisë.
FSHV ka bërë me dije se kërkohen teste më të thelluara për të përcaktuar nëse ka pasur ndonjë ndërrim gjinie në të kaluarën të sportistes. Deri në përfundimin e analizave, Nayara Ferreira mbetet e pezulluar, ndërsa palët nuk kanë dhënë asnjë reagim publik.
Përvojat e Ferreira janë ndërkombëtare: ajo ka luajtur për klube të njohura në Brazil (BMB/Mackenzie, San Bernardo, Sesi, Pinheiros), Spanjë (Gran Canaria), Çeki (Kravole Pole), Finlandë (LP Vampula), Portugali (Vitoria, Kairos) dhe Arabinë Saudite (Al Ahly, Alula). Këtë sezon, ajo debutoi te Dinamo, ku është përballur me një situatë të paprecedentë që nuk e ka hasur kurrë gjatë karrierës së saj në shtete të tjera.