Ngjarja e rëndë që tronditi Tiranën ditën e sotme merr përmasa edhe më shqetësuese. Burime nga grupi hetimor bëjnë me dije se e mitura 16-vjeçare, e cila plagosi veten me një copë xhami dhe kafshoi një punonjëse policie brenda komisariatit, ndodhej në gjendje të rënduar psikologjike, pasi ndjehej e përndjekur.
Sipas hetimeve paraprake, pas saj dyshohet se fshihej Jetmir Llanaj, 46 vjeç, i njohur si “i forti” i Lezhës, aktualisht në burg për veprimtari kriminale.
E mitura kishte qenë në një lidhje romantike me Llanajn përpara arrestimit të tij në muajin mars.
Pas ndarjes, vajza kishte nisur një marrëdhënie të re – diçka që Llanaj nuk e kishte pranuar.
Nga qelia, ai dyshohet se i kishte vënë “roje” për ta ndjekur dhe kontrolluar lëvizjet e saj.
Policia ka referuar materialet në Prokurori, ndërsa po hetohet për identifikimin e personave që e përndiqnin vajzën me urdhër të Llanajt.
Burime thonë se 16-vjeçarja kishte shfaqur shenja të frikës dhe tronditjes, ndërsa incidenti në komisariat ndodhi pas një shpërthimi emocional të rëndë.
Kush është Jetmir Llanaj – “i forti” me të kaluar të përgjakshme
Jetmir Llanaj është një emër i njohur për policinë dhe drejtësinë shqiptare.
Ai u arrestua më 3 mars 2025 nga policia e Kurbinit, si pjesë e një hetimi për gjobëvënie ndaj bizneseve dhe përdorim të të miturve për dërgimin e mesazheve kërcënuese.
Por historia e tij kriminale është shumë më e hershme. Në verën e vitit 2012, pas vrasjes së djalit të tij 9-vjeçar, Indrit Llanaj, nis një hasmëri e përgjakshme mes familjeve Llanaj dhe Shkreta, që solli disa viktima.
Llanaj dhe vëllai i tij Muharrem Llanaj u dënuan me nga 25 vite burg për vrasjen e Mark Shkretës, 71 vjeç, babait të autorëve të dyshuar të vrasjes së djalit të tij.
Në nëntor 2012, Jetmir Llanaj u dyshua edhe për atentatin në fshatin Shpërdhet të Fushë-Mamurrasit, ku mbeti i vrarë Gentian Shkreta, një tjetër anëtar i familjes rivale.
Pas disa ulje dënimi në apel, ai kishte dalë në liri prej disa muajsh, derisa u arrestua sërish në mars të këtij viti për gjobëvënie.
Ndaj 16-vjeçares janë referuar materialet në Prokurorinë e Tiranës, ndërsa po hetohet për rrethanat e ngjarjes në komisariat dhe për personat që e kanë ndjekur me urdhër të Llanajt.
Burime thonë se vajza ndodhet nën kujdes mjekësor dhe psikologjik, ndërsa hetimet janë në vijim për të zbardhur nëse ajo ishte nën presion apo kërcënim të drejtpërdrejtë.