Kryeministri Edi Rama ka marrë pjesë sot në panelin e Chatham House në Londër, ku diskutimi ishte për “Ballkanin Perëndimor dhe Bashkimin Europian”.
Me stilin e tij karakteristik ironik, Rama nuk kurseu batutat ndaj Bashkimit Europian dhe ish-ministres britanike të Brendshme, Suella Braverman.
“Procesi është teknik nga njëra anë dhe politik nga ana tjetër,” tha Rama. “Një gjë është e qartë — s’mund të kesh mbështetje politike nëse nuk përmbush aspektin teknik. Europa është si një spital me 28 doktorë… ishin 28, por njëri u çmend,” – shtoi ai, duke iu referuar daljes së Britanisë nga BE.
Kreu i qeverisë theksoi se disa prej vendeve anëtare të BE-së nuk e kanë mbështetur gjithmonë Shqipërinë në procesin e integrimit:
“Disa nga këta doktorë nuk na mbështesin, ndërsa tani na thonë jeni pararendës dhe pararojë. U them të mos e thonë shpesh, sepse kjo nxit xhelozi në rajon.”
Duke iu rikthyer me humor polemikave të dikurshme për emigracionin shqiptar në Britani, Rama kujtoi edhe qëndrimet e ish-ministres Braverman:
“Problemi për britanikët nuk janë shqiptarët — ata u përdorën si kokë turku për largimin nga BE. Më kujtohet Suella Braverman me deklaratat për emigrantët e paligjshëm… Ku është tani ajo? Nëse të mallkojnë shqiptarët, zhdukesh!”.