Prokuroria pranë Gjykatës së Shkallës së Parë të Juridiksionit të Përgjithshëm Tiranë ka përfunduar hetimet dhe ka dërguar për gjykim 20 nëpunës publikë, të akuzuar për veprën penale “Shpërdorim detyre” në bashkëpunim, parashikuar nga nenet 248 dhe 25 të Kodit Penal.
Sipas njoftimit zyrtar, hetimet janë zhvilluar në kuadër të procedimit penal nr. 2069 të vitit 2025, dhe kanë zbuluar se të pandehurit kanë vepruar në dëm të Ministrisë së Bujqësisë dhe Zhvillimit Rural, duke shkelur ligjin gjatë disa procedurave tenderimi.
Në total, shtatë procedura prokurimi janë vënë në hetim, pas kallëzimit të bërë nga Kontrolli i Lartë i Shtetit (KLSH). Këto procedura janë zhvilluar kryesisht me negociim pa shpallje paraprake, me një fond limit prej 525 milionë lekësh pa TVSH.
Tenderat e hetuar lidhen me:
Shpenzime për mbrojtjen e bimëve dhe luftimin e parazitëve në bujqësi;
Blerje pajisjesh për shërbimin veterinar (motoçikleta, kaska, veshje, doreza, çanta);
Blerje kafshësh të llojit gjedh për dëmshpërblimin e fermerëve të prekur nga dermatoza nodulare e gjedhit;
Sistem monitorimi me kamera për hidrovoret.
Prokuroria thekson se të pandehurit, në cilësinë e personave me funksion publik, kanë vepruar në kundërshtim me ligjet që rregullojnë veprimtarinë e prokurimeve publike, duke mos përmbushur detyrimet ligjore dhe duke dëmtuar interesat e shtetit dhe qytetarëve.
Hetimi ka vërtetuar se disa nga procedurat janë zhvilluar me testime fiktive të tregut dhe me mangësi të qëllimshme në përcaktimin e kritereve për mallrat e kërkuara.
Në përfundim, organi i akuzës ka vlerësuar se ekzistojnë prova të mjaftueshme për ta çuar çështjen në gjykim, pasi nga ana e anëtarëve të njësive të prokurimit janë konsumuar elementët e veprës penale “Shpërdorim detyre në bashkëpunim”.