Padrejtësia dhe një proces politik në Hagë ndaj ish-krerëve të Ushtrisë Çlirimtare të Kosovës ka bashkuar shqiptarët këtej e andej kufirit në sheshin “Skënderbej”. Mijëra qytetarë nga Kosova dhe Shqipëria janë mbledhur në Tiranë për të shprehur mbështetjen ndaj ish-krerëve të UÇK-së që po gjykohen në Hagë.
Ndër folësit kryesorë ishte ish-deputeti demokrat Azgan Haklaj, i cili mori fjalën para turmës dhe ripërsëriti mesazhin e protestës: “Liri për çlirimtarët.”
Gjatë fjalës së tij, Haklaj përsëriti thirrjen e njëanshme për unitet kombëtar:
“Nuk ka komb kosovar, kemi lindur dhe vdesim shqiptarë.”
Ai rikujtoi betimin e luftëtarëve të UÇK-së dhe inkurajoi tubimin që t’i qëndrojë pranë atyre që ai i quajti “çlirimtarë”, ndërsa turma përsëriste thirrjet pas tij: “UÇK, UÇK… Liri për çlirimtarët!”
Tubimi ka tërhequr pjesëmarrës nga të gjitha trevat shqiptare dhe është pjesë e një serie aktivitetesh të organizuara në mbështetje të udhëheqësve të UÇK-së.