Sekretari i Mbrojtjes së Shteteve të Bashkuara, Pete Hegseth, ka përjetuar momente paniku gjatë një fluturimi zyrtar nga Brukseli drejt SHBA-së, pasi avioni i tij shtetëror u detyrua të bënte ulje emergjente për shkak të një defekti serioz në kabinë.
Rreth një orë pas ngritjes, ekuipazhi raportoi një problem me presionin e brendshëm, çka bëri që avioni të zbresë menjëherë rreth 3 kilometra lartësi për të shmangur ndonjë incident më të rëndë. Më pas, mjeti ajror u drejtua drejt Bazës Ajrore Mildenhall, në veri të Londrës.
Hetimet paraprake zbuluan se një çarje ishte shfaqur në xhamin e përparmë të kabinës, duke detyruar pilotët të ndjekin procedurat standarde të emergjencës.
“Avioni u ul në përputhje me protokollet e sigurisë dhe të gjithë pasagjerët, përfshirë Sekretarin Hegseth, janë të sigurt,” deklaroi zëdhënësi i Pentagonit, Sean Parnell, në një postim në X (Twitter).
Kjo nuk është hera e parë që një avion ushtarak amerikan, që transporton zyrtarë të lartë, përballet me probleme teknike në fluturim. Më herët gjatë këtij viti, edhe aeroplani i Sekretarit të Shtetit, Marco Rubio, u detyrua të kthehej në Uashington për shkak të një defekti mekanik.