Sekretari i Përgjithshëm i NATO-s, Mark Rutte, deklaroi se aleanca po rrit prodhimin e armëve dhe sistemeve të mbrojtjes ajrore, në kuadër të një programi të ri mbështetjeje prej 2.2 miliardë dollarësh të udhëhequr nga SHBA për Ukrainën.
Duke folur përpara takimit të ministrave të Mbrojtjes në Bruksel, Rutte tha se qëllimi është forcimi i kapaciteteve ushtarake të Kievit dhe mbrojtja nga sulmet ajrore ruse. Ai theksoi se NATO dhe BE po punojnë ngushtë, duke shmangur “dyfishimin e përpjekjeve”.
Sipas Rutte-s, ndihma e re përfshin sisteme mbrojtjeje ajrore dhe interceptorë, thelbësorë për mbrojtjen e popullsisë civile. Ai konfirmoi gjithashtu se niveli i mbështetjes për Ukrainën mbetet i qëndrueshëm, duke shtuar se Rusia “nuk ka arritur të ndajë aleatët”.
Lidhur me shkeljet e hapësirës ajrore, Rutte nënvizoi se NATO është “plotësisht e aftë të mbrojë territorin e saj” dhe vepron vetëm kur ka kërcënim të drejtpërdrejtë.
“Rusët menduan se do ta fitonin këtë luftë brenda tre javësh. Tani, gati katër vjet më vonë, kanë humbur rreth 1 milion njerëz dhe kanë fituar vetëm territor minimal,” përfundoi ai.