Policia ka vënë në pranga një 41-vjeçar nga Orikumi, i dyshuar për vjedhjen e tre biçikletave në pronësi të një turisteje gjermane.
Ngjarja ka ndodhur më 7 tetor 2025, në një zonë plazhi të frekuentuar nga turistët. Sipas hetimeve, autori dyshohet se ka marrë tre biçikleta të markës “Bergamont”, të parkuara në ambient të hapur nga shtetasja gjermane.
Falë veprimeve të shpejta të specialistëve për Hetimin e Krimeve në Stacionin e Policisë Orikum, u bë e mundur identifikimi dhe arrestimi i autorit të dyshuar, shtetasit G. B., 41 vjeç, banues në Orikum.
Të tre biçikletat e vjedhura janë gjetur dhe sekuestruar në cilësinë e provës materiale.
Materialet procedurale i janë referuar Prokurorisë së Vlorës, ndërsa ndaj 41-vjeçarit rëndon akuza për veprën penale “Vjedhja”.