Finalizohet operacioni policor “SCAMS”, ku u arrestuan dy persona për mashtrimin e qytetarëve evropianë përmes investimeve të rreme në bursa.
Në pranga ranë Kejsi Përgjegji, administratori i call center-it, dhe Marjus Hysa, bashkëpunëtori i tij. Gjatë kontrollit, policia sekuestronte mbi 106,710 euro dhe 700,000 lekë të rinj, si dhe 51 kompjuterë, 14 telefona celularë, si dhe lista me klientët dhe shumën e përfituar nga mashtrimi.
Sipas njoftimit të policisë, në ambientet e subjektit punonin 38 operatorë, të cilët bindnin qytetarët të investonin në bursa fiktive dhe përfitonin përmes mashtrimit. Listat dhe dokumentacioni i gjetur tregojnë se vetëm për muajin tetor operatorët kishin objektiv të përvetësimit të 1.5 milionë eurove.
Operacioni u zhvillua nga Sektori për Hetimin e Krimeve Ekonomike dhe Financiare, me mbështetjen e forcës speciale “Shqiponjat”. Materialet procedurale janë dërguar në Prokurorinë e Tiranës për veprime të mëtejshme për veprat penale: “Mashtrim me pasoja të rënda”, “Punësim i paligjshëm”, “Fshehje të ardhurash”, “Mospagim taksash” dhe “Pastrim i produkteve të veprës penale”.
Njoftimi i policisë:
Specialistët e Sektorit për Hetimin e Krimeve Ekonomike dhe Financiare, në vijim të operacioneve të njëpasnjëshme për goditjen e krimeve ekonomike dhe financiare, bazuar në informacionet e marra se në rrugën “Bardhok Biba”, në një subjekt të licencuar për marketing, suport dhe konsulence në çdo veprimtari të ligjshme në territorin e Republikës së Shqipërisë dhe jashtë saj, po ushtrohej veprimtari e kundraligjshme e Call Centerit me qëllim mashtrimin e qytetarëve evropianë, kanë organizuar dhe finalizuar operacionin policor të koduar “SCAMS”.
Në kuadër të operacionit, specialistët e Sektorit për Hetimin e Krimeve Ekonomike dhe Financiare në DPPSH, me mbështetjen e Forcës së Posaçme “Shqiponjat” në DVP Tiranë, kanë ushtruar kontroll në ambientet e një subjekti me administrator shtetasin K. P., 28 vjeç, banues në Tiranë.
Gjatë kontrollit u konstatuan 38 operatorë, të cilët dyshohen se mashtronin qytetarë në vende të ndryshme të Evropës për të investuar në bursa fiktive.
Në ambientet e subjektit u gjetën dhe u sekuestruan në cilësinë e provës materiale:
65210 euro pa dokumentacion për vërtetimin e burimit; lista e emrave që i ishte vendosur çdo operatori në momentin e prezantimit me viktimën; lista e shumave që secili operator kishte përvetësuar me anë të mashtrimit; lista e objektivave të vendosura nga menaxherët dhe bonuset që merrnin operatorët në bazë të objektivave, ku për muajin tetor ishte 1.5 milionë euro; 51 njësi kompjuterike dhe 14 aparate celular.
Në vijim të operacionit, janë ushtruar kontrolle në banesat e bashkëpunëtorëve të afërt të shtetasit K. P., dhe nga kontrollet u gjetën dhe u sekuestruan në cilësinë e provës materiale 41500 euro dhe 700.000 lekë të rinj në banesën e shtetasit M. H., 38 vjeç, pa dokumentacion të burimit të të ardhurave.
Në përfundim të veprimeve të para hetimore, u arrestuan në flagrancë shtetasit K. P. dhe M. H.
Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme hetimore për veprat penale “Mashtrim me pasoja të rënda”; “Punësim i paligjshëm”; “Fshehje të ardhurash”; “Mospagim i taksave dhe tatimeve”; dhe “Pastrim i produkteve të veprës penale ose veprimtarisë kriminale”.