Zvicra ka njoftuar se do të vendosë një sistem mbrojtës kundër dronëve, për të forcuar sigurinë e trupave, infrastrukturës dhe pajisjeve ushtarake. Vendimi vjen pasi ushtria ka identifikuar një rritje të incidenteve me mikrodronë, minidronë dhe dronë të vegjël, sidomos pranë zonave të stërvitjes ushtarake gjatë këtij viti.
Zyra Federale e Armatimeve është autorizuar të blejë këtë sistem, pasi testet kanë rezultuar pozitive dhe ka nevojë për masa mbrojtëse të menjëhershme.
Mediat ndërkombëtare nënvizojnë se kjo lëvizje e Zvicrës shkon paralel me planet e Bashkimit Evropian për të vendosur mbrojtje kundër dronëve kryesisht në kufijtë lindorë dhe jugorë të BE-së.
Zëdhënësja e ushtrisë theksoi se që nga fillimi i vitit, dronë të vegjël janë zbuluar vazhdimisht mbi instalimet ushtarake ose pranë zonave të stërvitjes, duke rritur nevojën për këtë masë mbrojtëse.