Një nga bosët më të famëkeq të trafikut të drogës në Evropë ka marrë dënimin e radhës. Princ Dobroshi, 61 vjeç, i njohur prej dekadash në botën e krimit si “Peshkaqeni”, u dënua me 13 vite burg nga Gjykata Rajonale e Hamburgut.
Procesi gjyqësor lidhej me kontrabandimin e dhjetë tonëve kokainë nga Amerika e Jugut dhe Qendrore drejt Evropës, përmes portit të Hamburgut, në vitin 2020. Droga fshihej në kontejnerë mes bananeve, orizit, qymyrit apo xhelatinës, ndërsa më pas vulat falsifikoheshin për të shmangur kontrollin.
Sipas hetimeve, rrjeti i drejtuar nga Dobroshi kishte mbështetje deri tek punonjësit e portit dhe mbulonte të gjithë zinxhirin: nga transporti, te fshehja dhe deri tek rishitja shumëmilionëshe e kokainës.
Dobroshi, i arrestuar në Shqipëri në fund të vitit 2023 dhe i ekstraduar në Gjermani në vitin 2024, fillimisht mohoi gjithçka, por më pas bëri rrëfim, duke shkurtuar procesin gjyqësor. Megjithatë, roli i tij kyç dhe sasia gjigante e drogës bënë që dënimi të mbetej i rëndë.
Përveç burgut, gjykata vendosi t’i konfiskojë 8.2 milionë euro. Vetëm në vitin 2020, autoritetet kishin sekuestruar 2.5 milionë euro cash.
Ky nuk është kapitulli i parë në dosjen kriminale të “Peshkaqenit”: në vitet ’90 ai u arrestua në Norvegji, u arratis nga burgu në 1997, u kap sërish në Pragë në 1999 dhe u lirua në 2005. Pavarësisht goditjeve, Dobroshi nuk u tërhoq kurrë nga rrjeti ndërkombëtar i trafikut të drogës.