Shqipëria do të mbajë më 16 shtator Konferencën e gjashtë Ndërqeveritare me Bashkimin Evropian, ku pritet të hapen edhe 4 kapituj të rinj të negociatave për anëtarësim.
Ministrja e propozuar për Evropën dhe Punët e Jashtme, Elisa Spiropali, e vlerësoi këtë konferencë si një moment të rëndësishëm në rrugëtimin e Shqipërisë drejt BE-së, duke theksuar se hapja e kapitujve përqendrohet te Agjenda e Gjelbër dhe Ndërlidhja e Qëndrueshme, përfshirë transportin, energjinë, rrjetet trans-evropiane dhe mjedisin.
Spiropali shtoi se Shqipëria 2030 nuk është vetëm një objektiv ambicioz, por një plan konkret për t’u integruar në Evropë me dinjitet. Hapja e këtyre kapitujve vjen pas 24 kapitujve të hapur më parë, duke rikonfirmuar ritmin e paprecedent të vendit në procesin e negociatave.
Konferenca e gjashtë Ndërqeveritare pason një seri mbledhjesh të mëparshme, duke filluar që nga miratimi politik i ministrave për Çështjet Evropiane më 24 mars 2020 dhe Konferenca e parë Ndërqeveritare në korrik 2022, duke vazhduar me hapjen e grupeve të ndryshme të kapitujve deri në konferencën e pestë më 22 maj 2025.