Florian Kofina, është 38 vjeçari i cili u gjet pa shenja jete pranë gjirit të Barxhos në Ksamil, gjatë ditës së djeshme.
Sipas ekspertizës paraprake të kryer deri tani rezulton se i riu ka gjetur vdekjen si pasojë e mbytjes në det. Fillimisht, ai dyshohet se mund të ketë pësuar arrest kardiak dhe më pas se është mbytur.
Nga ekpertiza ka rezultuar se në trupin e tij nuk ka patur asnjë dëmtim të jetë shkaktuar nga jet ski, përveç një gërvishtjeje në pjesën e gjoksit. Por edhe ky dëmtim mendohet se mund të jetë shkaktuar nga përplasja me shkëmbinjtë, pasi ka ndërruar jetë.
Një tjetër fakt që shton dyshimet se vdekja ka ndodhur nga mbytja është se u zbulua se viktima i kishte mushkritë e mbushura me ujë.
Pavarësisht këtyre, trupi i pajetë është dërguar për ekspertizë të dytë në Institutin e Mjekësisë Ligjore në Tiranë.
Për të dhënë më tepër sqarime mbi këtë ngjarje, hetuesit kanë marrë në pyetje pronarin e jet ski dhe drejtuesin e saj, të cilët janë lënë të lirë.