Vrulli i ndërtimeve duket se po stopon, të paktën bazuar në lejet e miratuara në tremujorin e dytë të këtij viti. 352 leje ndërtimi u miratuan nga bashkitë në këtë periudhë nga 354 leje të miratuara vjet. Numri më i madh i lejeve i takon qarkut të Durrësit me 156 të tilla, ndërsa shtim të lejeve thotë INSTAT ka pasur edhe në Korçë dhe Shkodër.
Sipërfaqja e ndërtimore në të gjithë vendin është rrudhur me 67% thuhet në raport, nga 844 mijë metër katror në tremujorin e dytë vjet në 278 mijë metër katror këtë vit.
Vlera e përafërt e këtyre ndërtimeve të reja është parashikuar afro 184 milionë euro, nga 337 milionë euro vjet me rënie prej 45.5%.
Këto shifra tregojnë se në vend po ulet volumi i ndërtimeve shumëkatëshe, por kjo nuk është plotësisht e vërtet pasi vetë në raportin e INSTAT për herë të parë evidentohet se ‘ata nuk disponojnë të dhëna’ nga institucionet shtetërore që miratojnë leje ndërtimi, siç përshembull është Këshilli Kombëtar i Territorit, që aprovon lejet për kullat apo resortet e mëdha.
“Botimi i statistikave mbi lejet e ndërtimit mbështetet aktualisht vetëm në të dhënat e siguruara nga bashkitë, të cilat janë autoritetet kryesore për dhënien dhe raportimin e këtyre lejeve. Megjithatë, VKM nr. 408, datë 13.5.2015 “Për miratimin e rregullores së zhvillimit të territorit”, i ndryshuar*, përcakton se në procesin e miratimit të lejeve të ndërtimit përfshihen edhe institucione të tjera përgjegjëse, përveç bashkive. Duke qenë se ende nuk ka një raportim të standardizuar dhe të plotë nga të gjitha këto ente pranë INSTAT, të dhënat e publikuara për tremujorin e dytë bazohen vetëm në burimet bashkiake. Për këtë arsye, publikimi aktual nuk mund të krahasohet plotësisht me periudhat e ardhshme, deri në momentin që të gjitha institucionet përgjegjëse do të përfshihen në mënyrë të unifikuar në procesin e raportimit statistikor”, sqaron INSTAT.
Edhe tek lejet e bashkive vlera më e madhe e sipërfaqes ndërtimore është tek godinat me shumë kate, dhe pse si numër ka më pak leje. Ky është trendi i ndërtimeve që po vjen edhe si rezultat i pakësimit të trojeve për të ndërtuar, e që po sjell godina me dhjetëra kate.