Policia e Tiranës ka finalizuar operacionin e koduar “Quick Response”, duke arrestuar dy persona të përfshirë në ngjarjen e ndodhur një ditë më parë në Kombinat.
Hetimet treguan se pas një konflikti për motive të dobëta, 28-vjeçari O.A(V). qëlloi me armë zjarri në drejtim të një automjeti ku udhëtonin dy shtetas, duke rrezikuar jetën e tyre dhe të kalimtarëve. Në atë moment, automjetin e drejtonte 30-vjeçari S.B., i cili gjithashtu u vu në pranga.
Gjatë operacionit, u sekuestrua makina e përdorur nga autorët, ndërsa vijon puna për gjetjen e armës së zjarrit.
Nga të shtënat nuk pati të lënduar, por vetëm dëme materiale.
Ndërkohë, katër shtetas të tjerë të përfshirë në konfliktin paraprak u proceduan penalisht. Materialet iu referuan Prokurorisë së Tiranës për veprime të mëtejshme.
NJOFTIMI I PLOTË
Finalizohet operacioni policor i koduar “Quick Response”. Zbardhet dhe dokumentohet ngjarja e ndodhur dje, në Kombinat.
Qëlloi me armë zjarri në drejtim të automjetit me të cilin po lëviznin dy shtetas, pas një konflikti për motive të dobëta me ta, duke rrezikuar edhe jetën e kalimtarëve në afërsi, vihet në pranga autori.
Në pranga vihet edhe një 30-vjeçar, pasi dyshohet se drejtonte automjetin nga ku autori qëlloi me armë zjarri.
Sekuestrohet automjeti i përdorur nga autorët gjatë ngjarjes, ndërsa vijon puna për gjetjen e armës së zjarrit.
Në vijim të veprimeve hetimore për ngjarjen e ndodhur ditën e djeshme, rreth orës 12:10, në Kombinat, ku u qëllua me armë zjarri në drejtim të automjetit me të cilin lëviznin shtetasit R. K., 38 vjeç, dhe Zh. K., specialistët për Hetimin e Krimeve të Rënda, në bashkëpunim me Forcat Operacionale të DVP Tiranë dhe me Komisariatin e Policisë Nr. 6, në kuadër të operacionit “Quick Response”, kapën dhe vunë në pranga shtetasit:
• O. A(V)., 28 vjeç
• S. B., 30 vjeç, të dy banues në Kombinat
Gjithashtu, u proceduan penalisht shtetasit R. K., Zh. K., F. K. dhe B. M.
Nga hetimet paraprake ka rezultuar se 4 shtetasit e proceduar penalisht janë konfliktuar fizikisht me 2 autorët e ngjarjes. Pas konfliktit, për motive të dobëta, shtetasi O. A(V). ka qëlluar me armë zjarri në drejtim të automjetit të 38-vjeçarit, ndërsa shtetasi S. B. drejtonte automjetin nga ku qëlloi me armë zjarri 28-vjeçari.
Nga të shtënat janë shkaktuar vetëm dëme materiale.
Materialet procedurale iu referuan Prokurorisë së Tiranës, për veprime të mëtejshme.