Bota e sportit është në zi pas vdekjes tragjike të Laura Dahlmeier, dy herë kampione olimpike në biatlon, e cila humbi jetën gjatë një ngjitjeje në Laila Peak, Himalaje Pakistan.
Aksidenti ndodhi të hënën, në një lartësi prej 5,700 metrash, kur një rrëshqitje shkëmbinjsh goditi zonën ku ndodhej 30-vjeçarja së bashku me partnerin e saj të alpinizmit. Sipas autoriteteve lokale, vdekja e saj ishte e menjëhershme, ndërsa partneri mbeti i padëmtuar.
Laura Dahlmeier ishte një nga emrat më të mëdhenj të biatlonit në dekadën e fundit, fituese e dy medaljeve të arta dhe një të bronztë në Lojërat Olimpike Dimërore të PyeongChang 2018, si dhe shtatë herë kampione bote. Pas tërheqjes nga sporti, ajo iu përkushtua alpinzimit dhe aktiviteteve në natyrë – një pasion që fatkeqësisht i mori jetën.
Lajmi ka shkaktuar tronditje dhe dhimbje të madhe në Gjermani dhe në komunitetin ndërkombëtar të sportit, ku Dahlmeier do të mbahet mend si një kampione e jashtëzakonshme dhe një njeri me shpirt të madh.