Skënderbeu dhe Tirana dje zhvilluan një ndeshje miqësore. Pavarësisht se quhej e tillë, kjo përballje ishte shumë agresive si gjatë lojës ashtu dhe pas mbarimit të saj.
Sfida pas 90-të minutave përfundoi 2-2, por në këtë ndeshje nuk u fol për rezultat. Një sherr i cili nodhi në minutën e 73-të mes dy lojtarëve u bë shkak që sfida mes skuadrave të përfundonte në një “arenë boksi”.
Ndërhyrjet e ashpëra të Mario Rabiu nervozuan Gledi Micin, i cili reagoi ashpër ndaj lojtarit të korçarëve. Dy futbollistët u konfliktuan mes tyre dhe kjo bëri që arbitri t’i nxirrte të dy me kartonë të kuq.
Po nuk mbaroi me kaq pasi përplasjet mes tyre vazhduan. Në momentin që lojtari i Skënderbeu mori drejtimin për në dhomat e zhveshjes, një pjesëtar i stafit të Tiranës u afrua për të sqaruar situatën, por mesa duket situata u përkeqësua.
Ofendimet arritën deri në atë pikë, sa të dy pankinat, u përfshinë në një sherr masiv.
Në këtë situatë u përfshinë edhe tifozët, të cilët dallohen që nga shkallët e stadiumit gjuajnë stola dhe shishe. Sfida u ndërpre për disa minuta dhe ndërhyrja e Bledi Shkëmbit dhe drejtorit sportiv të Skënderbeut, Aerdi Gjançi bëri që situata të qetësohej.