Presidentja e Kosovës, Vjosa Osmani, ka reaguar ndaj situatës dramatike në Gaza, duke shprehur shqetësimin për pasojat e rënda që konflikti po ka mbi civilët, sidomos mbi fëmijët.
Në një postim në platformën “X” (ish-Twitter), Osmani tha se fëmijët nuk nisin kurrë luftëra, por janë ata që bartin peshën më të rëndë të çdo konflikti:
“Katastrofa humanitare në Gaza dhe vuajtjet e civilëve të pafajshëm, veçanërisht fëmijëve, është zemërthyes dhe duhet të marrë fund. Çdo fëmijë, çdo familje, pavarësisht kombësisë apo fesë, është e çmuar dhe duhet të mbrohet.”
Presidentja theksoi se mbrojtja e jetës së civilëve dhe sidomos fëmijëve duhet të jetë prioritet i të gjithë aktorëve ndërkombëtarë. Ajo shprehu mbështetjen e plotë të Kosovës për përpjekjet për armëpushim të ndërmjetësuara nga Shtetet e Bashkuara, Katari dhe Egjipti, si dhe për lirimin e menjëhershëm të të gjitha pengjeve.
Osmani nënvizoi gjithashtu rëndësinë e sigurimit të aksesit në ushqim, ujë të pijshëm dhe ilaçe për popullsinë civile, duke e quajtur këtë një prioritet urgjent për të lehtësuar vuajtjet e njerëzve të pafajshëm që ndodhen në mes të konfliktit.
Në fund të reagimit të saj, Presidentja e Kosovës tha se vendi mbështet të gjitha përpjekjet ndërkombëtare që synojnë një zgjidhje të drejtë dhe të qëndrueshme, ku si izraelitët ashtu edhe palestinezët mund të jetojnë në paqe, siguri dhe me respekt të ndërsjellë:
“Derisa të arrihet kjo e ardhme, duhet bërë çdo përpjekje për të parandaluar humbjen e mëtejshme të jetëve të pafajshme dhe për të lehtësuar vuajtjet e të gjithë njerëzve.”
Children never start wars! But they’re the ones who suffer most and bear the largest consequences of any conflict.
The humanitarian catastrophe in Gaza and the suffering of innocent civilians, especially children, is heartbreaking and must end. Every child, every family,…
— Vjosa Osmani (@VjosaOsmaniPRKS) July 28, 2025