Klodjan Domi 46 vjeç nga Durrësi ka përfunduar në prangat e policisë, pasi akuzohet për trafikim dhe shfrytëzim për prostitucion të një vajze 20-vjeçare me shtetësi ruse.
Arrestimi u bë në kuadër të operacionit të koduar “Gjuetari”, të zhvilluar nga Seksioni për Hetimin e Trafiqeve të Paligjshme në Policinë e Durrësit. Sipas hetimeve, i arrestuari Domi kishte mashtruar të renë me premtimin se do ta punësonte si kameriere. Pasi e kishte futur në mënyrë të paligjshme në Shqipëri, nga Podgorica, në tetor të vitit 2023, ai e kishte detyruar të ushtronte prostitucion në hotele të ndryshme, duke përdorur dhunë fizike dhe kërcënime të vazhdueshme.
Viktima u shfrytëzua për rreth dy vite, ndërsa pagesat për çdo takim varionin nga 250 deri në 300 euro, të cilat përfitoheshin nga vetë 46-vjeçari. Vajza u detyrua të kryente marrëdhënie me persona të ndryshëm, në kushte të papranueshme dhe nën presion të vazhdueshëm.
Gjatë kontrollit në banesën e tij, policia sekuestroi në cilësinë e provës materiale një armë gjahu teke të markës “KralArms”, dy palë dylbi dhe tre telefona celularë, që dyshohet se janë përdorur për aktivitetin kriminal.
Gjithashtu, në kuadër të hetimeve është shpallur në kërkim një 39-vjeçar, shtetasi E. S., gjithashtu banues në Durrës, i dyshuar si i përfshirë në këtë rast.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme hetimore.