Greqia po përballet me një valë të nxehti ekstreme, me temperatura që kanë arritur kulmin këtë të hënë. Sipas shërbimit meteorologjik meteo.gr, temperaturat më të larta deri tani janë regjistruar në qytetet Kardicë dhe Larisë, ku termometri ka shënuar plot 45 gradë Celsius.
Përveç këtyre dy qyteteve, nxehtësia përvëluese është ndjerë fort edhe në Tyrnavos, Thebë, Farsala, Tragana (Fthiotidë) dhe Avlona (Atikë), ku temperaturat kanë qenë vetëm pak më të ulëta.
Në Larisë, kushtet ekstreme klimatike e kanë shndërruar qytetin në një “fantazmë”, me rrugët dhe sheshet thuajse të zbrazëta, pasi banorët janë të detyruar të qëndrojnë në ambiente të brendshme për shkak të vapës së padurueshme.
Autoritetet greke kanë paralajmëruar për rreziqe të larta, duke këshilluar shmangien e daljes në orët e pikut dhe marrjen e masave mbrojtëse ndaj temperaturave përvëluese, veçanërisht për të moshuarit, fëmijët dhe personat me probleme shëndetësore.
Akropoli dhe monumentet e tjera arkeologjike në Athinë mbyllen përkohësisht për shkak të valës së të nxehtit
Për shkak të valës së të nxehtit që ka përfshirë vendin, hyrjet në Akropol dhe disa nga vendet kryesore arkeologjike në Athinë do të qëndrojnë të mbyllura nga e hëna, 22 korrik, deri të premten, 25 korrik 2025, gjatë orëve më të nxehta të ditës.
Sipas njoftimit zyrtar të lëshuar nga Drejtoria e Monumenteve Arkeologjike të Qytetit të Athinës, monumentet do të qëndrojnë të mbyllura çdo ditë nga ora 12:00 deri në 17:00, për të garantuar sigurinë e punonjësve dhe vizitorëve.
Monumentet e përfshira në këtë masë janë:
Akropoli dhe Klitya
Tempulli i Zeusit Olimpik (Olympeion)
Likeu i Aristotelit
Agora Romake
Agora Antike
Biblioteka e Adrianit
Autoritetet u bëjnë thirrje qytetarëve dhe turistëve të shmangin ekspozimin në diell gjatë orëve të pikut dhe të ndjekin udhëzimet e sigurisë.