Seanca e jashtëzakonshme për votimin e dekreteve të presidentit për ndryshimet në qeveri u zhvillua me tensione.
Gjatë seancës u vërejt teksa deputetët e PD-së përplasën tavolinat dhe bllokuan foltoren, madje Dash Sula hipi dhe mbi karrige.
Deputeti i PD-së reagoi në lidhje me situatën e tensionuar gjatë seancës plenare të një ditë më parë, të cilën e lidh me zjarret në Shëngjin. Sula në një postim në Facebook shkruan se ka dashur t‘i kërkojë ministrave të bënin mbledhje urgjente për situatën e zjarreve, ndaj është ngjitur mbi karrige.
Postimi i Sulës :
“Shëngjini digjej, Parlamenti krihej” Pasditen e djeshme Parlamenti “celebronte” ndryshimet në qeveri. Kolegët e shumicës të veshur shik, shfaqeshin të buzëqeshur dhe duke perqafuar anëtarët më të rinj të kabinetit për të patur aksesin e tyre në ato institucione më vonë. Disa herë kërkova fjalën për procedurë te Kryetarja e Parlamentit e cila është zgjedhur deputete në Lezhë, por disa herë nuk më dha të drejtën e fjalës. Për të tërhequr vëmendjen e ministrave në ikje dhe atyre në ardhje, vendosa të hipja mbi karrigen ku unë ulem dhe të ngrija zërin për Parlamentin që nuk është në shërbim të qytetarëve. I kërkova duke thirrur me zë të lartë që të mbyllnin “festën” dhe burokracitë e emërimeve të reja, por të bënin një mbledhje urgjete dhe të merrnin masa sepse Shëngjini ishte në rrezik. Në Shëngjin po shkatërroheshin pyjet, banesat private të qytetarëve, hotelet dhe turizmi, ndaj hipja mund të duket e pahijshme, por në një situatë anormale nuk mund të mbetet gjë tjetër përveçse se të ngresh zërin për padrejtësitë dhe lënien në harresë të qytetarëve. Po tregoj mesazhin që më erdhi nga një qytetar pak pasi kishte nisur seanca: “O vëlla! Shëngjini po digjet, ju merreni me llafe aty”, shkruan Dash Sula.