Qytetet e Prishtinës, Mitrovicës, Podujevës, Lipjanit dhe Vushtrrisë janë përfshirë sot nga erëra të fuqishme, të shoqëruara me ngritje të konsiderueshme pluhuri, duke krijuar pamje të turbullta dhe vështirësi në qarkullim.
Pamjet e publikuara nga MeteoBallkan dhe përdorues të rrjeteve sociale tregojnë rrugë të mbuluara me pluhur dhe qiell të errësuar nga fortësia e erës.
Instituti Hidrometeorologjik i Kosovës (IHMK) ka njoftuar se, ndonëse parashikohet mot me diell dhe vranësira të pakta, nuk përjashtohet mundësia për reshje të izoluara shiu dhe shkarkesa rrufesh në disa zona gjatë ditës.
Temperaturat do të luhaten nga 12°C deri në 16°C në orët e mëngjesit, ndërsa gjatë mesditës pritet të arrijnë deri në 29°C. Era do të fryjë nga verilindja me intensitet të lehtë deri mesatar, në intervalin 1 deri në 9 m/s.
IHMK ka bërë thirrje për kujdes të shtuar, veçanërisht në zonat ku mund të ketë rrufe, duke këshilluar shmangien e qëndrimit në ambiente të hapura gjatë pasdites.