Pas raportimeve për sulme me molotov ndaj mjeteve të IKMT-së dhe urës në lagjen “Gjelaj” në Theth, Policia e Shkodrës ka reaguar zyrtarisht, duke hedhur poshtë pretendimet për sulm ndaj fadromave, por konfirmuar përpjekjen për djegie të një ure druri.
Ngjarja ndodhi rreth orës 15:35, kur një person ende i paidentifikuar hodhi një shishe me lëndë djegëse në drejtim të urës. Falë ndërhyrjes së shpejtë të policisë, u shmang djegia e plotë, megjithëse ura pësoi dëmtime të pjesshme.
Asnjë mjet i IKMT-së nuk është dëmtuar, dhe nuk ka patur rrezik për jetën e qytetarëve apo punonjësve shtetërorë, sqaron Policia.
Strukturat e rendit dhe të Forcës Kombëtare të Sigurisë ndodhen në zonë për të mbështetur aksionin për prishjen e ndërtimeve pa leje, ndërsa grupi hetimor është duke punuar për identifikimin dhe kapjen e autorit.
Policia bën thirrje për mos pengim të operacioneve zyrtare dhe paralajmëron se çdo akt dhune apo sabotimi do të përballet me forcën e ligjit.
Reagim i Drejtorisë Vendore të Policisë Shkodër
Në lidhje me një lajm të publikuar në media dhe rrjete sociale, se në fshatin Theth janë sulmuar me lëndë djegëse (molotov) mjetet fadromë të IKMT-së dhe një urë në lagjen “Gjelaj”, sqarojmë se:
Rreth orës 15:35, një shtetas ende i paidentifikuar ka hedhur në rrugë një shishe me lëndë djegëse, duke tentuar djegien e një ure druri, por me ndërhyrjen e Policisë është parandaluar djegia e plotë e saj. Nga zjarri, ura ka pësuar dëmtime të pjesshme.
Sqarojmë se asnjë mjet fadromë nuk është sulmuar me lëndë djegëse dhe nuk është shkaktuar asnjë dëm material apo rrezik për jetën e qytetarëve apo punonjësve të shërbimeve shtetërore.
Shërbimet e Drejtorisë Vendore të Policisë Shkodër dhe ato të Forcës Kombëtare të Sigurisë ndodhen në zonë, në mbështetje të strukturave të IKMT Tiranë dhe IMT të Bashkisë Shkodër, për zbatimin e planit për prishjen e ndërtimeve pa leje në fshatin Theth.
Grupi hetimor vijon veprimet për identifikimin dhe kapjen e personit që hodhi në rrugë lëndën djegëse.
Policia është e vendosur për të garantuar sigurinë e shtetasve dhe të automjeteve që punojnë në zonë për prishjen e ndërtimeve pa leje dhe apelon për banorët që të mos kryejnë veprime që pengojnë veprimet e ligjshme të strukturave që operojnë në terren, pasi do të përballen me forcën e ligjit.