Zjarri në Parkun Kombëtar të Lurës vijon të jetë jashtë kontrollit, ndërsa situata mbetet kritike për shkak të erës së fortë dhe terrenit të thepisur. Për shkak të përmasave të mëdha që ka marrë vatra, Forcat e Armatosura i janë bashkuar zjarrfikësve dhe grupeve të tjera të angazhuara në terren.
Sipas të dhënave nga vendngjarja, zjarri është përqendruar në një zonë të thepisur me bimësi të rrallë, përfshirë ah, pisha dhe barishte, dhe po përhapet me shpejtësi nën ndikimin e erës.
Në operacionin për shuarjen e flakëve janë angazhuar: 6 efektivë të zjarrfikëses (MZSH), 16 punonjës të ADZM-së, 5 nga njësia administrative e Lurës, 12 vullnetarë dhe 30 ushtarakë nga Forcat e Armatosura.
Deri më tani, nuk ka një përllogaritje të saktë të sipërfaqes së djegur, por paraprakisht mendohet se janë disa hektarë të përfshirë nga flakët.
Pavarësisht përpjekjeve të pandërprera, vatra e zjarrit nuk është izoluar ende, për shkak të vështirësive të terrenit dhe kushteve atmosferike të pafavorshme. Forcat në terren po vijojnë punën me intensitet për ta vënë nën kontroll situatën.