Kryeministri Edi Rama lëshoi sot një paralajmërim të fortë ndaj tregtarëve që shesin produkte bulmeti pa faturë, duke deklaruar se duke filluar nga e hëna e ardhshme do të nisë sekuestrimi i çdo shisheje qumështi apo produkti bulmeti që qarkullon pa dokumentacion tatimor.
Në përfundim të mbledhjes me kryebashkiakët në Durrës, Rama tha se Drejtoria e Përgjithshme e Tatimeve është angazhuar për të sensibilizuar tregtarët informalë të produkteve të bulmetit, por theksoi se periudha e paralajmërimeve ka përfunduar.
“Duke filluar nga java e ardhshme do të konfiskohet çdo lloj shisheje qumështi pa faturë dhe çdo lloj bulmeti pa faturë,” u shpreh Rama. Ai shtoi se, përveç shkeljes së ligjit tatimor, “është edhe shumë e rrezikshme në këtë fazë të vitit me këto temperatura që mund të shkaktojnë larg qoftë helmime që janë plotësisht të evitueshme”.
Kryeministri e cilësoi këtë fenomen si “të patolerueshëm” dhe nënvizoi se masat do të jenë të menjëhershme në të gjitha dyqanet dhe pikat e tregtimit.