Qeveria miratoi ndryshimet e reja në regjistrimin e vendbanimit dhe vendqëndrimit, me synimin për të thjeshtuar dhe digjitalizuar këtë proces për qytetarët shqiptarë dhe shtetasit e huaj.
Sipas vendimit, deklarimi, ndryshimi ose saktësimi i adresës së vendbanimit dhe vendqëndrimit do të kryhet në mënyrë elektronike përmes portalit qeveritar “e-Albania”. Në këtë platformë, qytetarët duhet të ngarkojnë dokumente ligjore që provojnë pronësinë apo përdorimin e banesës, si kontrata qiraje, huadhënieje apo të tjera.
Për bashkimin me familje ekzistuese, kërkesa bëhet gjithashtu online dhe duhet të konfirmohet nga kryefamiljari i familjes pritëse. Gjithashtu, deklarimet e kryefamiljarit për vendbanimin do të pasqyrohen automatikisht për të gjithë anëtarët e familjes.
Në rast të ndryshimit të vendbanimit nga një anëtar madhor i familjes, kërkohet më parë veçimi nga familja.
Ndryshimet parashikojnë edhe rregulla të posaçme për shtetasit që qëndrojnë në institucione të ekzekutimit të vendimeve penale ose në paraburgim më shumë se 3 muaj, si dhe për ata që qëndrojnë për kurim mjekësor afatgjatë në institucione shëndetësore. Institucionet përgjegjëse duhet të njoftojnë zyrat e gjendjes civile brenda afateve të paracaktuara.
Shkëmbimi i të dhënave mes institucioneve dhe regjistrave të gjendjes civile do të bëhet përmes platformës qeveritare të ndërveprimit elektronik, duke përmirësuar koordinimin dhe saktësinë e regjistrimeve.
Ky vendim synon të modernizojë dhe të rrisë transparencën në proceset e regjistrimit të vendbanimit dhe vendqëndrimit në Shqipëri.