Kryeministri i Sllovenisë, Robert Golob, ka hapur një debat të fortë politik, duke propozuar organizimin e një referendumi kombëtar për të vendosur të ardhmen e anëtarësisë së vendit në NATO.
Kjo lëvizje vjen në një moment kur qeveria ka miratuar rritjen graduale të shpenzimeve ushtarake në përputhje me objektivat e aleancës transatlantike, duke synuar të arrijë 2% të Prodhimit të Brendshëm Bruto deri në vitin 2030 — pavarësisht kundërshtimeve të brendshme.
“Nëse jemi anëtarë të NATO-s, atëherë duhet të marrim përgjegjësi. Nëse jo, le ta thotë populli fjalën e tij,” deklaroi Golob në një konferencë për shtyp, duke paraqitur referendumin si mundësinë për qytetarët të zgjedhin mes angazhimit të plotë në NATO ose një rishikimi të pozicionit të vendit.
Partnerët e koalicionit qeverisës, përfshirë Partinë Socialdemokrate dhe të majtën radikale Levica, kanë shprehur rezerva të forta, duke paralajmëruar se rritja e shpenzimeve ushtarake mund të dëmtojë sistemin social dhe të çojë në “militarizim të panevojshëm”.
“Qytetarët nuk kanë votuar për një shtet ushtarak, por për një shtet social dhe solidar,” u shpreh një përfaqësues i Levica-s në parlament.
Në prag të samitit vjetor të NATO-s, ku pritet të theksohet rëndësia e shpërndarjes së barabartë të barrës ushtarake mes anëtarëve, Sllovenia, vend me rol strategjik në Ballkanin Perëndimor, është kritikuar shpesh për mungesë investimesh në mbrojtje.
Kryeministri Golob po ashtu theksoi se Sllovenia do të mbështesë përpjekjet për paqe në Ukrainë vetëm përmes strukturave të NATO-s, duke përjashtuar çdo veprim të njëanshëm jashtë kornizës së aleancës.
Në një kontekst të tensioneve gjeopolitike dhe sfidave të sigurisë në Evropë, rezultati i referendumit pritet të jetë një test i rëndësishëm për orientimin strategjik të Sllovenisë në vitet e ardhshme.