Një zjarr i përmasave të mëdha ka përfshirë pasditen e sotme një sipërfaqe të konsiderueshme me shkurre dhe pisha në zonën e fshatit Zvërnec, në Vlorë.
Flakët janë përhapur fillimisht pranë rrugës, por për shkak të erës së fortë, zjarri ka avancuar me shpejtësi, duke përfshirë dhjetëra pisha dhe duke rrezikuar seriozisht dy hotele që ndodhen në afërsi.
Në vendngjarje ndodhen forca zjarrfikëse dhe banorë të zonës, të cilët po punojnë për izolimin dhe shuarjen e flakëve. Megjithatë, kushtet e motit, veçanërisht era e fortë, po e vështirësojnë ndërhyrjen dhe përpjekjet për ta vënë nën kontroll situatën.
Autoritetet nuk kanë raportuar deri më tani për dëme në njerëz apo dëmtime të ndërtesave, por vlerësojnë se rreziku mbetet i lartë dhe situata kërkon vigjilencë të shtuar.