Pas shiut të rrëmbyeshëm që goditi dje Milanon, moti i keq u përhap në Firence, Torino, Gjenova dhe zonën më të gjerë të Napolit. Zjarrfikësit dhe struktura e mbrojtjes civile u aktivizuan për të ndihmuar banorët e shtëpive në katet përdhese, të cilët nuk mund të largoheshin për shkak të përmbytjeve.
Në Milano, dy punëtorë u plagosën ndërsa përpiqeshin të largonin trungje dhe degë pemësh të rrëzuara në rrugë nga erërat e forta. Operacionet e zjarrfikësve kaluan 500 ndërhyrje, dhe brenda një ore ra shi në masën që zakonisht bie në pesëmbëdhjetë ditë.
Trafiku hekurudhor u rivendos në linjën Milano-Bolonja, ku mbrëmë një tren u godit nga rrufeja, por asnjë pasagjer nuk pësuar dëmtime. Jashtë Venecias, policia shpëtoi një banor që kishte shkuar për të notuar në det, pavarësisht paralajmërimeve për mot të keq, dhe nuk mundi të kthehej në breg.
Toskana dhe Umbria u përballën gjithashtu me valën e dhunshme të motit të keq që shkaktoi dëme dhe ndërprerje në zona të ndryshme të Italisë. Në zonat e Firences, Pratos dhe Arezzos, ranë rreth 4 mijë goditje rrufeje, përveç stuhive intensive që shkaktuan rrëzimin e pemëve. Në të gjithë rajonin, u regjistruan 27 mijë goditje rrufeje në 12 orë. Në zonat e Gambassi Terme dhe Montespertoli, në provincën e Firences, ranë përkatësisht 61 mm dhe 60 mm shi në pak më shumë se një orë. Gjithashtu, vlen të përmendet një rrebesh me mbi 60 mm shi që ra në një orë në zonën e San Gimignano, në jugperëndim të Firences.
Në provincën e Trevisos, përmbytja në Piave i izoloi shtatë të rinj në një ishull të vogël në Fagarè di San Biagio di Callalta. Falë ndërhyrjes së shpëtimtarëve, të rinjtë u nxorën në siguri. Në të njëjtën zonë, më 18 qershor, një i ri u mbyt ndërsa ishte me miqtë në një nga “plazhet e vogla” në shtratin e lumit Piave.
Në Itali, situata është e ndarë: në jug, vala e të nxehtit vazhdon dhe po shkakton probleme thatësire, ndërsa në zonat qendrore dhe veriore reshjet e breshrit kanë shkaktuar dëme të konsiderueshme, sidomos në vreshta.
Meteorologët parashikojnë reshje të dendura në Gjenova gjatë natës, dhe rrebeshe në 14 nga 20 rajonet e vendit gjatë ditës së nesërme.