Përmbytjet shkatërrimtare që goditën Teksasin gjatë fundjavës kanë shkaktuar një tragjedi të madhe njerëzore, me të paktën 68 viktima të konfirmuara deri më tani. Autoritetet amerikane njoftojnë se 10 vajza dhe mësuesja e tyre rezultojnë ende të zhdukura, ndërsa operacionet e kërkim-shpëtimit vijojnë pa ndërprerje.
Shirat e rrëmbyeshëm, që përfshinë rajonin në Ditën e Pavarësisë së SHBA-së, shkaktuan rritje të menjëhershme të nivelit të ujit në lumin Guadalupe — thuajse 8 metra për më pak se një orë, duke përmbytur lagje të tëra dhe rrëmbyer banesa, automjete dhe jetë njerëzish.
Qarku Kerr është më i godituri, me 59 viktima, përfshirë 21 fëmijë. Humbje të jetëve janë regjistruar gjithashtu në qarqet Travis, Burnet, Kendall dhe Tom Green. Ndër viktimat raportohet të jetë edhe drejtori i kampit “Camp Mystic” dhe drejtuesi i një kampi tjetër në zonë.
Në një deklaratë për mediat, Drejtori i Emergjencave të Teksasit, Nim Kidd, u shpreh se ekipet po kërkojnë të mbijetuar në ajër, në tokë dhe në ujë, ndërsa Guvernatori Greg Abbott shpalli gjendjen e jashtëzakonshme dhe kërkoi ndihmë federale.
Sipas dëshmitarëve, përmbytjet ishin të befasishme dhe shkatërrimtare. “Uji arriti lartësinë e pemëve dhe rrëzoi shtëpi e makina”, tha një banor i zonës. Në kampin ku strehoheshin vajzat e zhdukura, ujërat kanë lënë pas dëme të mëdha dhe rrënoja.
Reagimi ndaj fatkeqësisë është përballur me kritika, pasi shumë banorë deklarojnë se paralajmërimi për evakuim mbërriti shumë vonë. Sekretarja e Sigurisë Kombëtare, Kristi Noem, pranoi shqetësimet dhe tha se administrata e presidentit Trump do të shqyrtojë përmirësimin e sistemeve të paralajmërimit dhe teknologjive të motit.
Sipas ekspertëve, përmbytje të tilla ekstreme po bëhen më të shpeshta për shkak të ndryshimeve klimatike, që e kanë bërë motin gjithnjë e më të paparashikueshëm dhe ekstrem. Ndërkohë, mbi 850 shpëtimtarë, të mbështetur nga 14 helikopterë, vijojnë kërkimet për të zhdukurit në një garë kundër kohës.