Gjyqtarja Elsa Ulliri ka paraqitur dorëheqjen nga shqyrtimi i dosjes “Partizani”, një prej proceseve më të rëndësishme dhe të ndjeshme që përfshin ish-kryeministrin Sali Berisha dhe dhëndrin e tij, Jamarbër Malltezi. Sipas burimeve nga GJKKO, kërkesa për dorëheqje është dorëzuar para 10 ditësh pranë drejtuesit të Gjykatës së Posaçme Kundër Korrupsionit dhe Krimit të Organizuar, Erion Bani.
Shkaku i dorëheqjes së gjyqtares është lidhja familjare me deputeten e Partisë Demokratike, Andia Ulliri. Pikërisht ky afrim, sipas gjyqtares Elsa Ulliri, cenon parimin e paanshmërisë në këtë proces të ndjeshëm penal që ka në qendër akuzat për korrupsion ndaj një ish-zyrtari të lartë shtetëror.
Kush është Elsa Ulliri?
Elsa Ulliri është një gjyqtare me karrierë të konsoliduar në sistemin e drejtësisë shqiptare. Pas përfundimit të shkollës së Magjistraturës në vitin 2014, ajo u emërua gjyqtare në Gjykatën e Rrethit Gjyqësor Lezhë, ku shërbeu për disa vite dhe mbajti edhe postin e zëvendëskryetares. Në tetor 2022, ajo u transferua në Gjykatën e Posaçme, pasi kaloi me sukses procesin e Vetting-ut, duke marrë një rol kyç në çështjet penale të profilit të lartë.
Dosja “Partizani”: Akuzat ndaj Berishës dhe Malltezit
Në qendër të dosjes “Partizani” është procesi i dyshuar i privatizimit të kompleksit sportiv të njohur në Tiranë. Më 19 maj, Gjykata e Posaçme vendosi ta kalojë dosjen për gjykim në themel, pasi SPAK akuzon ish-kryeministrin Sali Berisha dhe dhëndrin e tij Jamarbër Malltezi për korrupsion të nivelit të lartë.
Sipas aktakuzës, gjatë kohës që ishte në krye të qeverisë, Sali Berisha ka përdorur pushtetin e tij për të favorizuar dhëndrin e tij në procesin e privatizimit të objekteve dhe terreneve të Klubit Sportiv “Partizani”, duke mundësuar më pas ndërtimin e 18 kullave shumëkatëshe në atë hapësirë.
SPAK deklaron se janë krijuar dyshime të arsyeshme se:
-
Berisha, në cilësinë e tij si Kryeministër, ka ndërmarrë veprime të drejtpërdrejta për të miratuar ligje dhe akte nënligjore që i hapnin rrugën përfitimit të Malltezit.
-
Janë bërë ndërhyrje konkrete në administratën publike për të përshpejtuar dhe garantuar privatizimin në favor të tij.
-
Strukturat shtetërore janë vënë në dispozicion të Malltezit për realizimin e procesit të privatizimit.
Përfitimet e dyshuara të Jamarbër Malltezit
Jamarbër Malltezi, sipas hetimeve të SPAK, ka përfituar miliona euro përmes privatizimit të pronës shtetërore dhe ndryshimit të destinacionit të saj nga sportiv në banim. Akuzat përfshijnë:
-
Privatizimi i paligjshëm i pronës shtetërore për interesa personale.
-
Lehtësitë e marra për ndërtimin e kullave në ish-kompleksin Partizani.
-
Përfitimet financiare nga kompania “Homeplan” sh.p.k., ku ai rezulton aksioner pas përfitimit të pasurive të paluajtshme.
SPAK llogarit përfitimet e Malltezit në vlerën prej rreth 5.4 milionë euro, shumicën e të cilave ai i ka marrë pa investuar fare në shoqërinë ndërtuese.