Një episod i pazakontë ka ndodhur këtë të hënë në Portin e Durrësit, ku një jaht luksoz është zhdukur për disa orë nga vendi i ankorimit. Pronari i jahtit, Dorian Alikaj, ka bërë kallëzim në Komisariatin e Durrësit pasi konstatoi se mjeti i tij lundrues, “Tamomar 2”, nuk ndodhej më në kalatën ku ishte ankoruar prej muajsh.
Sipas denoncimit, Alikaj u informua rreth orës 14:00 për zhdukjen e jahtit dhe njoftoi menjëherë Policinë Kufitare dhe më pas Policinë e Durrësit. Forcat policore u vuan në lëvizje, duke nisur kërkimet për mjetin e zhdukur.
Pak orë më vonë, jahti u pikas teksa rikthehej në ish-kalatën e peshkimit. Personat që ndodheshin në bord u shoqëruan menjëherë në polici për të sqaruar rrethanat e ngjarjes.
Një detaj që mbetet i paqartë është fakti se si u arrit të ndizet mjeti lundrues, duke qenë se çelësat e tij ndodheshin në ruajtje nga kapiteni Memet Ayhan Ulus. Aktualisht tre persona janë nën hetim dhe po merren në pyetje për zbardhjen e plotë të çështjes.