Punonjës të sektorit të transportit dhe telekomunikacionit zhvilluan një tubim proteste në Tiranë, duke ngritur shqetësime për kushtet e vështira të punës dhe kërkuar përmirësime konkrete. Ata kërkuan rritje pagash, kushte më të mira pune dhe eliminimin e konkurrencës së pandershme në treg.
“Nuk e kundërshtojmë tregun e lirë, por kërkojmë që konkurrenca të jetë e rregullt. Sot, numri i taksive është i tejmbushur, me rreth 250 banorë për një taksi, çka deformon tregun,” u shpreh një prej taksistëve pjesëmarrës.
Protesta erdhi si pjesë e një fushate ndërkombëtare që bën thirrje për punë dinjitoze, paga të drejta dhe kushte të sigurta pune. Punonjësit theksuan se, përveç pagesës së pamjaftueshme, përballen me orare të gjata, mungesë pushimesh dhe presion të lartë.
“Pa tarifa të drejta dhe pushime të rregullta për shoferët, nuk mund të flasim për siguri në rrugë,” theksoi një tjetër punonjës i transportit urban dhe interurban, duke paralajmëruar për rrezikun e një kolapsi në këtë sektor.
Përfaqësuesit e kompanive të transportit rrugor theksuan se ka vështirësi financiare për të mbajtur punonjësit, të cilët po largohen gjithnjë e më shumë drejt vendeve të Bashkimit Europian për paga më të mira.
“Operatorët nuk kanë mundësi t’i rrisin pagat aq sa kërkohet pa mbështetje dhe politika bashkëpunuese nga institucionet shtetërore. Minimalja duhet të shkojë në 95 mijë lekë neto,” u shpreh Dashnor Mema.
Protestuesit paralajmëruan se do të vijojnë mobilizimin edhe për një javë, derisa të dëgjohen kërkesat e tyre dhe të respektohen të drejtat e përcaktuara në Kodin e Punës.