Ministri i Mbrojtjes së Greqisë, Nikos Dhendias, ka thirrur një mbledhje të jashtëzakonshme të Këshillit të Shefave të Shtabit për të vlerësuar situatën e tensionuar në Lindjen e Mesme dhe për të përditësuar planin antibalistik të vendit. Në takim morën pjesë komandantët më të lartë ushtarakë dhe oficerë të lartë, ndërsa u vendos përforcimi i mbrojtjes ajrore për të qenë të gatshëm ndaj çdo kërcënimi të mundshëm.
Burimet ushtarake theksojnë se kjo mbledhje u zhvillua si masë paraprake, me shqetësimin kryesor për një përfshirje të mundshme të SHBA-së në konfliktin Izrael-Iran dhe pasojat që mund të sjellë kjo për rajonin.
Kryeministri Kyriakos Mitsotakis ka theksuar se Greqia nuk do të përfshihet në asnjë operacion ushtarak, duke nënvizuar rëndësinë e zgjidhjes së krizës përmes kanaleve diplomatike dhe duke shprehur shqetësim për ndikimet negative ekonomike që mund të sjellë përshkallëzimi i konfliktit, sidomos në tregjet e energjisë dhe sektorin e transportit detar, që janë shtylla kryesore e ekonomisë greke.