Autoritetet iraniane kanë lëshuar një paralajmërim të fortë ndaj qytetarëve, duke u kërkuar që të fshijnë menjëherë aplikacionin WhatsApp nga telefonat e tyre. Televizioni shtetëror pretendon se aplikacioni po mbledh të dhëna sensitive dhe po i transmeton ato në Izrael — një akuzë e rëndë e bërë pa asnjë provë konkrete.
Deklarata ka shkaktuar shqetësim të gjerë, ndërsa “WhatsApp”, pjesë e grupit “Meta Platforms”, ka reaguar menjëherë duke e cilësuar pretendimin si të rremë dhe të rrezikshëm. Kompania theksoi se komunikimet mbrohen nga enkriptimi “end-to-end” dhe asnjë mesazh nuk mund të lexohet nga palë të treta, përfshirë edhe vetë platformën.
“Ne nuk gjurmojmë vendndodhjen, nuk ruajmë të dhëna mbi bisedat e përdoruesve dhe nuk ndajmë informacione me asnjë qeveri,” thekson WhatsApp në reagimin e saj.
Ekspertët ndërkombëtarë të sigurisë kibernetike shohin këtë veprim si pjesë të një përpjekjeje të vazhdueshme të regjimit iranian për të kontrolluar rrjedhën e informacionit, sidomos në prag të tensioneve të brendshme dhe të jashtme.
Precedentët janë të shumtë: gjatë protestave masive të vitit 2022 pas vdekjes së Mahsa Amini, Irani bllokoi WhatsApp-in, Google Play dhe disa platforma të tjera sociale. Megjithatë, qytetarët kanë gjetur mënyra për t’i anashkaluar kufizimet përmes VPN-ve dhe proxy-ve.
Vendimi i fundit pritet të acarojë edhe më tej marrëdhëniet e tensionuara mes Iranit dhe Perëndimit.