Agjencia Kombëtare e Veterinarisë dhe Mbrojtjes së Bimëve (AKVMB) njoftoi zgjerimin e hartës së përhapjes së murtajës së ruminantëve të vegjël në Shqipëri. Deri më tani janë identifikuar 7 ferma të prekura në 5 vatra shpërthimi.
Sipas njoftimit zyrtar, krerët e infektuar po asgjësohen në përputhje me protokollet veterinare për të ndaluar përhapjen e mëtejshme të kësaj sëmundjeje shumë ngjitëse.
AKVMB ka vendosur ndalimin e lëvizjes dhe tregtimit të bagëtive të gjalla në zonat e prekura, ndërsa u bën thirrje fermerëve të raportojnë çdo shqetësim te veterinerët lokalë.
“Ky është një hap thelbësor për mbrojtjen e tufave dhe për kontrollin e sëmundjes,” thekson Agjencia, duke njoftuar gjithashtu se ekipet veterinare janë në terren, duke marrë mostra dhe monitoruar nga afër situatën.
