Dy të rinj nga Tottenham, Londër, janë shpallur fajtorë për vrasjen e shtetasit shqiptar Ervin Baraku, ngjarje që ndodhi më 23 korrik 2024 në një stacion metroje në kryeqytetin britanik.
Kevin Nguyen dhe Milumo Pedrinho, të dy 21 vjeç, u përfshinë në një konflikt me viktimën, 33-vjeçarin Baraku, në një rrugë pranë stacionit të metrosë. Sipas Policisë Britanike të Transportit, të rinjtë ndoqën shqiptarin në stacionin e metrosë ku ndodhi sulmi fatal.
Pedrinho e goditi Barakun me një thikë të madhe, pas një ndjekjeje të dhunshme që përfundoi tragjikisht – Baraku ra nga shkallët dhe pësoi plagë të rënda. Ai u transportua me urgjencë në spital, por ndërroi jetë një javë më vonë, më 30 korrik.
Nguyen u arrestua vetëm një ditë pas sulmit, më 24 korrik, ndërsa Pedrinho u ndalua disa ditë më vonë.
Superintendenti i Detektivëve Sam Blackburn e përshkroi ngjarjen si një “sulm të pakuptimtë dhe tragjik,” duke shtuar:
“Nuk ka vend për dhunë të tillë në rrjetin hekurudhor apo në shoqëri.”